整整一星期的家鄉生活！！

年廿九
１１：３０番大陸，包車番去，個司機話＄７００，睬佢都傻，最後壓價到＄４００，４：００就番到，都幾快下～～

年三十
１０：００起身，同阿爺去稔山（市集的所在地）買菜，用＄３０買左ｄ魚就番屋企，全日睇電視，打下麻雀，陪下細路打機咁啦，之後有親戚番黎，好清閒咁過．．．．（因為佢地霸住副麻雀）睡覺時發現房內有幾隻大黃蜂，連忙用殺蟲水噴殺，全部６隻死晒．．．好得人驚，全部曱甴咁大隻．．．訓到凌晨１２：００，家家都燒炮仗，好噪，訓唔到．．．

大年初一
都係咁過，但係就有溫書，因為假期完後就測中文，都有溫下ａ．ｍａｔｈｓ，見到ｄ　三角幾何就唔識，停左．．．又有親戚番黎，之後一齊玩副啤牌，鋤ｄｅｅ，潛烏龜．．．

年初二
慣例，媽咪的親戚全部都要去舅父家吃飯，舅父家就在隔離村，相距１公里都唔知有無．．．去到有好多人，幾個表哥表姐，幾個姨媽親戚，加埋三十幾四十個，要分三張大枱食．．．叫表哥用電單車載我到稔山，買左隻王心凌黎聽～～表哥買左一箱公仔麵，同幾躉煙花係夜晚燒～我地就係果度訓一晚，夜晚放煙花，好靚呀～舅父家的狗可能被響聲嚇壞，竟躲左雞籠下不敢亂動！而二表哥的ｂｂ仔就嚇到喊．．．（佢好得意架！）之後見到我地條村有煙花爆炸，燒著左堆草，好彩最後都無乜事．．．同表哥訓，間房幾大，好簡單，但係好鍾意！！可能又係實而不華啦！只不過居然無枕頭俾我．．．

年初三
赤口，唔出得街，被逼係舅父家住多日．．．睇電視，打牌度日，ｄ書漏係屋企，無得溫．．．夜晚又買煙花燒，無昨晚果ｄ咁靚，２日夾埋燒左＄７００，好貴．．．

年初四
去進叔叔家，果度叫「好招樓」，好怪的名．．．果度風景都幾好，真係阡陌交錯，ｄ屋又排列整齊，是美的和諧，只是缺乏相機，否則一定影餐飽！！祥仔帶我去打街機，之後又睇人地籃球比賽，睇一陣就走ｌｕ，收到＄１００利是！！想去草莓園摘草莓，但係全部都好細粒，唔摘ｌｕ，坐車番去，最後我仲試騎電單車，載表哥番去～～夜晚燒烤，兩個表哥去買野，都會唔記買最重要果樣：炭．．．食左幾隻燒唔熟的雞翼，但係在大陸燒烤算係上下啦．．．

年初五
食埋早飯就番屋企，番到去見到住香港仔的叔公番左黎，又有利是，我諗住呢日番香港，但係阿媽叫我住多日先．．．．２點幾諗住出稔山食野，等左７架車到上唔到，叫埋爺爺一齊出去，好多人，逼上車，要企，我仲踩到人地隻腳．．．食野，叫左２碟烏冬先食得飽，夾夾埋埋食左＄１００買ｇａｍｅｂｏｙ，因為之前果部壞壞地，買左部假野＄１５０夜晚，我個妹和２個堂弟話要同我同房，但係得一張床，最後佢地３個訓床，我訓地下，塊地好凍呀．．．

年初六（今日）
４：００醒左，因為諗住今日搭頭班車去深圳，最後７：００先出門口，搭左第三班車．．．搭緊巴士果陣，可能因為行李太重，爺爺跌倒了，幸好無大礙．．．１０：２０就番到香港家，好快呀！第一次咋．．．跟住就去左飲茶，ｄ野食好食過鄉下果ｄ好多呀～食左好多野，飽晒～～之後好乖仔咁溫書～～約左４：００踢波，去林士德，贏多過輸，雞年首次踢就入左２球喇～～

總結：利是＄９００

聽左一隻歌，覺得ｄ歌詞好正，好有感興：
　你都如何回憶我　帶著笑或是很沉默
　這些年來　　有沒有人能讓你不寂寞
　　後來　我總算學會了　如何去愛
　　可惜你　早已遠去　消失在人海
　　　後來　終於在眼淚中　明白
　　　有些人　一旦錯過就不在
　　　　　永遠不會再重來
　　　有一個男孩　愛著那個女孩