同荷蘭豆踢波

今日約左荷蘭豆踢波．．．　阿聰臨時唔去，話去網吧打機喎．．．
約左３點葵芳個場等，我準時去到，只係見到椰汁糕．．．
２個人都無波，苦等左陣，荷蘭豆都到喇，好彩佢有個好新既波，
但係又唔夠氣喎，話ｓｔａｎｌｅｙ會帶泵，又等．．．
等多陣ｓｔａｎｌｅｙ到左，佢又話唔記得帶泵．．．
唉，自己出錢泵波啦．．．　好野，射陣波先～～
家俊都到，幾個人就咁射波，射到４點幾，等ｄ人放學先有波鬥．．．
魚子同ｍｉｓｔａｋｅ路過，波波之後又黎左睇，
同魚子２個係場邊唔係做乜呢？？
之後叫波波幫手守龍，佢唔制喎．．．　（９成想溝女啦～～）
４點幾阿廖黎埋，就同班蘇浙既鬥波，佢地有個區隊果個前鋒．．．
仲有個係好茅果個，之前搞到我斷腳趾果個．．．
唔理喇，照鬥波，有ｓｔａｎｌｅｙ係度，係咁漏油．．．
後防完全係好似個碗穿左個窿咁．．．　一貫慣例，輸波先．．．
之後我地屈佢打龍，又贏番２場喎～～
踢左陣，佢地有個幾勁的高佬黎左幫手，我地唔多夠鬥．．．
話咁快就無氣又無力，搵左個「Ｒ．Ｃａｒｌｏｓ」代我．．．
佢一ｄ都唔似ｃａｒｌｏｓ，鬼咁咋．．．
抖左陣，去買野食＆野飲，因為我無食ｌｕｎｃｈ，買左個包、炸兩，
之後又鬥過，都係咁上下啦，總之就好求其咁踢啦．．．
果個好茅既依然都係咁茅，連阿廖都係咁話，
仲同佢鬥泵，搞到佢都無甜頭～～　踢到７點就走．．．

聽日有好多節目呀～～
１．　去朗豪坊，ｍａｎｄｙ有ｆｕｎｃｔｉｏｎ
２．　去旺角場睇波（亞洲足協杯），晨曦ｖｓ淡賓尼
３．　去肥仔屋企睇波（歐洲聯賽冠軍杯）睇通宵，ＡＣ米蘭ｖｓ利物浦